«Әліппе» мен «Букварь»

Биылғы оқу жылының ерекше жаңалығы – «Әліппенің» қайта оралуы. Көркем безендірілген, оқуға жеңіл «Әліппе» мен «Букварь» кітаптары бүлдіршіндерге қуаныш сыйлады.
Бар білімнің бастауы – «Әліппенің» тарихына қысқаша тоқталсақ, ағартушы ғалым А.Байтұрсынұлының жаңа әліпби (төте жазу) үлгісімен жазылған алғашқы «Оқу құралы» 1912 жылы Орынбор қаласында басылған. Айта кетейік, А.Байтұрсынұлына дейін де бірнеше әліппе үлгілері қолданыста болып, тәжірибеден өткені белгілі. Алайда қазақ мектептері үшін А.Байтұрсынұлы «Әліппесі» барынша лайықты болды.
Біздің мектептің оқушылары, ата-аналары, ұстаздары Әліппемен сағына қауышып, өз пікірлерін білдіруде.

Тәуелсіздік жылдары білім саласы да түрлі реформаларды бастан өткергені белгілі. Соның бірінде «Әліппе» оқулығын «Сауат ашу» алмастырған болатын. Дегенмен, балдырғандар үшін «Әліппенің» орны бөлек екенін уақыт көрсетті. Осылайша ҚР Білім және ғылым министрі А.Аймағанбетовтың бастамасымен «Әліппе», «Ана тілі» оқулықтары қайта оралды. Жаңа «Әліппенің» авторлары – Ә.Жұмабаева, Г.Уайсова, М.Оспанбекова.